Во цела држава се конечни резултатите за избор на советници, освен на три места во Шуто Оризари, каде во недела ќе се прегласува првиот круг откако е утврдено дека теоретски прегласувањето може да има влијание на конечните резултати. Таму беше поништено гласањето поради преправање на записници, а избирачките одбори беа разрешени и им се закануваат кривични пријави.

• По спроведената симулација е утврдено дека прегласувањето може да влијае на бројот на советнички места во оваа општина и затоа ќе има прегласување на првиот круг во недела, изјави Борис Кондарко, претседател на ДИК.

Во вториот круг, изборите на поништените места ќе ги спроведуваат избирачки одбори од Петровец и Сопиште.

44 градоначалници беа избрани во првиот круг, а во 33 општини ќе се гласа во вториот круг: Аеродром, Боговиње, Брвеница, Валандово, Виница, Дебар, Дебарца, Демир Капија, Карпош, Кичево, Конче, Кочани, Крушево, Куманово, Лозово, Македонска Каменица, Македонски Брод, Могила, Неготино, Пробиштип, Ранковце, Росоман, Струга, Студеничани, Тетово, Центар, Чешиново-Облешево, Чучер Сандево, Шуто Оризари и Град Скопје.

Во Гостивар, Врапчиште, Центар Жупа и Маврово-Ростуше каде што не беше исполнет цензусот од една третина од гласачите ќе има нова изборна постапка која ќе почне по објавувањето на конечните резултати од вториот круг.

Далиборка Демјанска