Неколкудневните поројни дождови, бурите и катастрофалните поплави предизвикани од ураганот Мелиса влијаеја на животите на повеќе од 700.000 деца низ Карибите, според проценките на УНИЦЕФ.

Силната бура, која директно ги погоди Јамајка и Куба, а ги погоди и Хаити и Доминиканската Република, остави голем број раселени деца и семејства. Инфраструктурата е уништена, посевите се уништени, а основните услуги како што се здравствената заштита и образованието се нарушени.

Тим на УНИЦЕФ што работи во главниот град Кингстон, во среда ги обиколи областите погодени од ураганот.

Олга Исаза, претставничка на УНИЦЕФ во Јамајка, го опиша влијанието на трагедијата како „огромно“ и ја повика меѓународната заедница да ги поддржи луѓето од Јамајка.

„Ги гледаме луѓето во вознемиреност како се обидуваат да стигнат до своите роднини, своите родители, а се заглавени на патот“, рече Исаза. „Тоа е невозможно бидејќи количината на дрвја што паднаа е неверојатна, а сите патишта се блокирани“.

„Ги познавам луѓето од Јамајка, тие се лавови и ние сме тука со нив обидувајќи се да им помогнеме да го поминат овој тежок момент“, додаде таа. „Но, навистина им е потребна поддршка“.

Регионот Санта Круз е под вода, поплавени се згради и објекти како што е училиштето „Света Елизабет“ кои се сериозно оштетени по ураганот. Мелиса стигна до копното во југозападна Јамајка во вторник како ураган од категорија 5 со максимални ветрови од 185 милји на час (295 км/ч). Ги изедначи рекордите за јачина на атлантските урагани што стигнаа до копното, и по брзината на ветерот и по барометарскиот притисок.

T.Д.