Сите ние до крајот на животот ќе ја носиме траумата од трагедијата во Кочани во која загинаа 63 наши сограѓани, синови и ќерки, родители и пријатели, рече претседателката Гордана Силјановска Давкова во редовното годишно обраќање во собранието.

„Со пожарот во дискотеката во Кочани на површина излезе грдото лице на стихијното одлучување, игнорирањето на процедурите, недостатокот на системска контрола, но и на културата на неказнивост и на двојни стандарди. Постојат моменти кога една држава застанува пред себе, трагедијата во Кочани беше токму таков момент, момент на национален шок, колективна тага и траума и длабоко преиспитување“, порача меѓудругото Силјановска-Давкова.