Повеќе од сто малолетни лица се убиени во Појасот Газа откако стапи во сила примирјето во октомври минатата година, соопшти Фондот за деца на Обединети нации (УНИЦЕФ).

Во извештајот на УНИЦЕФ се наведува дека помеѓу загинатите 60 се момчиња, а 40 девојчиња.

Портпаролот на УНИЦЕФ, Џејмс Елдер истакна дека смртните случаи се главно предизвикани од воздушни напади и напади со беспилотни летала, но оти се регистрирани и загинати малолетни лица од огнено оружје, како и жртви на неексплодирани направи од претходните борби.

– Ова зима шест деца починаа од хипотермија, наведе Елдер.

Според него, бројот на жртвите најверојатно е поголем, бидејќи УНИЦЕФ евидентира само потврдени случаи.

Израелската армија тврди дека никогаш намерно не ги таргетира децата и оти секогаш се стреми да ги поштеди цивилите во своите операции.