Уште не стасан предлогот во собрание, здружените граѓански организации остро против измените на Кривичниот законик. Главната забелешка е дека текстот, како преодно решение, не ги отстранува суштинските штети предизвикани со измените на Кривичниот законик од септември во 2023 година, туку дополнително ја ослабува казнено-правната заштита од корупција и злоупотреба на службената положба.

Затоа, јасно и експлицитно бараме да се вратат идентичните одредби од Кривичниот законик кои беа на сила пред измените од 2023 година, како единствено разумно, правно сигурно и одговорно преодно решение, сѐ до донесување на целосно нов Кривичен законик, се наведува во реакцијата на Платформата на граѓански организации за борба против корупција испратена до Министерството за правда.

За потсетување, во член 353 не се вратени одредбите од став 5. Со тоа, во суштина се декриминализираат најчестите и најштетни форми на корупција во јавните набавки – фаворизирање, селективно постапување, прилагодување на тендерските услови, склучување договори без реална потреба и толерирање на незаконитости.