Главниот град на Индија, Њу Делхи, деновиве е обоен во илјадници живописни нијанси со почетокот на традиционалниот фестивал на лалиња, кој привлекува бројни туристи и семејства.

Стотици илјади лалиња во жолта, портокалова, црвена, розова и бела боја ги красат уредените градини и булевари, создавајќи вистинска пролетна разгледница во метрополата која често се соочува со проблеми со загадување на воздухот.

Настанот, кој започнал како мал хортикултурен експеримент, со текот на годините прерасна во една од најпосетените сезонски манифестации во градот.

Организатор е Општински совет на Њу Делхи, од каде информираат дека годинава се очекува да процветаат повеќе од 500.000 лалиња, најголемиот дел од луковици увезени од Холандија, земја позната по долгогодишната традиција во одгледување на овие цветови.

Фестивалот стана омилена дестинација и за љубителите на фотографијата и за активните корисници на социјалните мрежи, кои ги користат цветните алеи како идеална позадина за фотографии и видеоснимки.

Посетителите велат дека шаренилото носи чувство на свежина и оптимизам, а иако лалињата цветаат кратко, спомените од нивната убавина остануваат во текот на целата година.