Европската комисија (ЕК) денеска ги одобри плановите на германската влада за поддршка на енергетски интензивните индустрии со 3,8 милијарди евра (4,5 милијарди долари) во наредните години.

Како што пренесе агенцијата ДПА, финансирањето е наменето за привремено да ги ослободи компаниите од високите цени на електричната енергија, во обид да се избегне преселување на активностите надвор од Европската Унија (ЕУ), каде што цените на енергијата често се пониски, а еколошките стандарди помалку строги, соопшти комисијата.

Шемата за помош им овозможува на подобните бизниси кои работат во Германија да аплицираат за исплати на олеснувања и предвидена е да ги поддржува енергетски интензивните сектори до крајот на 2028 година.

Корисниците, сепак, ќе бидат обврзани да инвестираат најмалку половина од примената помош во мерки насочени кон намалување на трошоците за електрична енергија на компанијата без зголемување на употребата на фосилни горива.

Плановите за помош се поврзани со долгорочните прашања за конкурентноста во ЕУ, но се совпаѓаат со неодамнешниот пораст на цените на енергијата предизвикан од војната во Иран.

Државната помош во ЕУ е строго регулирана за да се обезбедат еднакви услови за сите меѓу економски силните и помалку богатите земји-членки и, во многу случаи, бара одобрение од комисијата.