Вооружен напаѓач убил осум лица при пукање на автобуска станица во Египет, пред да биде застрелан од полицијата, соопшти денеска Министерството за внатрешни работи.

Во инцидентот во Абнуб, на околу 300 километри јужно од Каиро, во провинцијата Асиут, се повредени пет лица, пренесе агенција ДПА.

Министерството соопшти дека сторителот синоќа отворил оган неселективно кон минувачите на една автобуска станица. Безбедносните сили потоа го пронашле на земјоделско земјиште. Мажот бил убиен во престрелка со полицијата.

Според првичните истраги, сторителот веќе подолго време имал проблеми со менталното здравје и се лекувал во психијатриска болница во Каиро, соопшти министерството.

Јавното обвинителство отвори истрага за случајот.