Писателката Гордана Јовиќ-Стојковска е избрана за нова претседателка на Друштвото на писатели на Македонија (ДПМ). Таа доби мнозинство гласови (71) од членовите на ДПМ на денешното редовно Собрание.

За членови на новиот Управниот одбор на ДПМ се избрани досегашниот претседател Живко Грозданоски, заедно со другите членови: Петар Андоновски, Драгана Евтимова, Хана Корнети, Елизабета Јончиќ и Сеида Бегановиќ.

За нови членови на Судот на честа е избрана писателката Ирена Јурчева, поранешната претседателка на ДПМ, Соња Стојменска Елзесер, како и авторите Диме Ратајкоски, Марина Мијаковска и Иван Антоновски.

„Сакам да им честитам на сите избрани, особено на младата екипа, на која особено ѝ се радувам. Верувам дека имаме многу добро конципирана изборна програма и дека успешно ќе соработуваме. Па и половина од замисленото да го направиме, соработувајќи во рамки на Друштвото, со особен обѕир кон членовите надвор од Скопје, како и од заедниците – ќе биде одлично“, рече новата претседателка на ДПМ во обраќање до членството.

Новото раководство на ДПМ најави дека наскоро треба да одржи конститутивна седница на која ќе избере потпретседател.