Законот за игри на среќа, нема да ја намали навиката за играње, туку ќе доведе до експанзија на црниот пазар – реакција на АСОМ

Дејан Дејан

/

пред 95 дена

Сподели преку :

Со изгласувањето на Законот за игрите на среќа во Собранието, власта донесе една од најштетните економски и правни одлуки во државата, со кој не се штитат граѓаните, туку се уништува легалната дејност и се отвора пат за црниот пазар, велат од Асоцијацијата на спортски обложувалници на Македонија (АСОМ) откако во Собранието беше усвоен законот за игри на среќа.

Од Асоцијацијата на спортски обложувалници на Македонија укажуваат дека законот е донесен без суштински дијалог со секторот кој го претставува, без транспарентна јавна расправа и без да биде прифатен ниту еден аргумент на домашните и странските експерти.

Дополнително, самиот процес на подготовка на законот беше нетранспарентен. Законот не беше објавен на Единствениот национален електронски регистар на прописи (ЕНЕР), со што сите засегнати беа лишени од можноста да дадат свои мислења, предлози и забелешки. Таквиот начин на носење закон отвора сериозни сомнежи за почитувањето на принципите на транспарентност и добро владеење.

АСОМ останува на ставот дека со овој закон нема да се намали играњето. Ниту една релевантна европска или светска практика не покажува дека затворањето на легалните приредувачи ја намалува навиката за играње. Напротив, искуствата покажуваат дека рестриктивните модели секогаш доведуваат до експанзија на нелегалниот пазар, дивите обложувалници и нелегалните интернет-платформи, каде што нема контрола, нема заштита на играчите, нема наплата на даноци и нема механизми за спречување на пристапот на малолетници.

Oценката на Асоцијацијата е дека последиците ќе бидат сериозни и далекусежни, директно се загрозуваат околу 10.000 работни места; негативни последици ќе почувствуваат повеќе од 50.000 работни места во поврзаните индустрии – ИТ секторот, обезбедувањето, транспортот, маркетингот, добавувачите и бројни други стопански гранки; повеќе од 800 деловни објекти ќе останат празни, со сериозни последици и врз пазарот на недвижности; државата ризикува да изгуби повеќе од 350 милиони евра буџетски приходи кои денес легално се уплаќаат, а тие средства ќе завршат во сивата економија.

Асоцијацијата на спортски обложувалници на Македонија потенцира дека мерката за задолжителна дислокација, забраната лиценцираните приредувачи да приредуваат интернет игри на среќа, драстичното зголемување на давачките и нарушувањето на веќе стекнатите права од издадените лиценци претставуваат пакет мерки чија единствена последица ќе биде затворање на најголемиот дел од легалните приредувачи. Истовремено, законот воспоставува сериозна нерамноправност на пазарот. Додека приватните лиценцирани приредувачи се исклучуваат од интернет пазарот и се оптоваруваат со значително повисоки давачки, државата за себе создава монополска позиција преку ексклузивното право за приредување интернет игри на среќа, под значително поповолни финансиски услови. Тоа не е европски модел на регулирање на пазарот.

Кога ќе се затворат легалните приредувачи, навиката за играње нема да исчезне. Македонија ќе добие експанзија на црниот пазар, наместо поголема безбедност ќе има поголемо нелегално работење, наместо повисоки буџетски приходи ќе има поголеми загуби и наместо подобра заштита на младите нивна уште поголема изложеност на нелегални приредувачи.

АСОМ ќе поднесе иницијативи пред Уставниот суд со кои ќе ја оспори уставноста на Законот за игрите на среќа, како и постапката по која беше донесен.