Случајот со текстилните работничките од поранешната штипска конфекција „Алкон Текс“ стигна и до меѓународната кампања „Чиста облека“. Откако стечајот им заврши во рок од неколку минути, а бидејќи нивната фирма, во која што шиеја остана без имот, никогаш не можат да ги добијат отпремнините, платите и придонесите. Работничките со помош на  „Гласен текстилец“ одлучија за нивните проблеми да слушнат и  брендовите за кои работи нивниот поранешен работодавач.

Претставничките од „Чиста облека“ велат дека работниците и во Романија, Бангладеш и во Македонија имаат исти проблеми. Најголем дел од пријавите во земјава се во делот на исплатата на плати.

„За овој регион најчест проблем е платата. Не само неисплата на минално загарантираната плата, туку и неплаќањето на прекувремената работа, бонусите или празниците. Тука е честа работата за викенд, што се плаќа како обичен работен ден. А проблем се и договорите, бидејќи од него зависат и останатите бенефиции што го следуваат работникот“, вели Артемиса Љарја од „Чиста Облека“

 

„Понижувањето, викањето, користењето на навредлив јазик и малтретирањето, се нешта за кои добиваме се повеќе и повеќе пријави што е сосема недостоинствен третман на работниците“, вели Бетина Мусјолек од „Чиста облека“.

„Чиста Облека“  преку акции и кампања ги  алармираaт  потрошувачи и жителите од градовите каде се седиштата на големите брендови на кој начин се произведува она што го носат и така настојуваат  да се подобрат условите во текстилството и кожарството.  Апелираат брендовите ковид кризата да не ја користат како изговор за уназадување на правата и безбедноста на работниците.

Викторија Јованова