Двопартиска група американски сенатори вети солидарност и оружје за време на посетата на Киев, предупредувајќи го рускиот претседател Владимир Путин да не започнува нова воена офанзива против Украина. Киев и неговите западни сојузници алармираат откако Русија собра десетици илјади војници во близина на границите на Украина и изврши притисок врз САД за безбедносни гаранции, вклучително и блокада на пристапот на Украина во НАТО.

Русија негира дека планира нов воен напад. САД беа најмоќниот поддржувач на Украина во конфликтот со Москва по руската анексија на Крим во 2014 година и избувнувањето на војната во источна Украина.

„Мислам дека Путин ја направи најголемата грешка во својата кариера потценувајќи колку храбро народот на Украина ќе се бори против него ако тој изврши инвазија“, им рече на новинарите сенаторот Ричард Блументал.

„Ќе воведеме строги економски санкции, но уште поважно, ќе му дадеме на народот на Украина оружје, смртоносно оружје што му е потребно за да ги брани своите животи“, рече тој по средбата меѓу делегацијата и украинскиот претседател Володимир Зеленски.

Тоа оружје може да вклучува противтенковски проектили Javelin, ракети Стингер, мало оружје и чамци, рече тој. „Нашата порака е: ќе има последици доколку тој одлучи да ја наруши светоста на оваа демократија“, додаде сенаторот Ејми Клобучар.