Никој не е над законот. Ваква порака упати бугарскиот премиер, Кирил Петков, кој беше прв на распит, по апсењето на екс-претседателот на бугарската влада,  Бојко Борисов. Ги повика бугарските обвинители да реагираат, откако случајот го отвори шефицата на Европското обвинителство, Лаура Ковеси. Таа во средата го посети Петков во Софија и му предаде документација за 120 случаи, за кои постои сомневање за корупција и несовесно работење со пари добиени од европските фондови. Само шест часа подоцна, следуваше апсењето на Борисов, како и на неколку негови соработници од партијата ГЕРБ.

На обвинетите им е доделен 24-часовен притвор, но обвинение, според адвокатот на Борисов, засега не може да се поднесе, бидејќи тоа е можно само по писмена потврда од обвинител.

Случаите се однесуваат на несовесно употреба и незаконско  располагање со буџетските средства, неправилности во прераспределбата на земјоделските субвенции и корупција со пакетот на помош што ЕУ им го додели на земјите членки во екот на пандемијата. Меѓу приведените е и поранешниот бугарски министер за финансии, Владислав Горанов и поранешната шефица на владината служба за информирање Севдалина Арнаудова. Поранешната претседателка на собраниската Комисија за буџет, Менда Стојанова е претходно сослушувана.

Поранешниот бугарски вицепремиер тврди дека се работи за одмаздољубивост на актуелната влада.

Претресот во домот на Борисов траел три часа. Уште синоќа, сите пратеници на ГЕРБ, поранешни министри и поддржувачи се собраа пред неговата куќа и се упатија кон судот.

Пред зградата на бугарската Влада утрово се одржа мирен протест.Симпатизерите на ГЕРБ, но и пратениците од пратеничката група на оваа партија, побарале предвремени избори во Бугарија и оставка на владата, но главното барање им е итно ослободување на Бојко Борисов од притвор.

Далиборка Дамјанска Цветановска