На рускиот воен брод Москва избувнал пожар, а потоа дошло до експлозија на резерви на муниција, јавуваат руските медиуми. Тие наведуваат и дека сите морнари биле претходно евакуирани.

Претходно гувернерот на Одеса изјави дека водечкиот брод на руската Црноморска флота бил погоден од украински ракети. Украинските власти, исто така, велат дека Русија се обидува да спаси 510 членови на екипажот во бродот.

Советникот на украинскиот претседател Олексеј Арестович го потврди нападот на бродот, но не го откри својот став.

„Брзо гори. Сега. Со вакво немирно море, не се знае кога ќе може да им стигне помошта“, рече тој, истакнувајќи дека на бродот имало 510 членови на екипажот.

Воениот брод Москва стана познат на самиот почеток на војната кога украинските бранители на Змискиот остров ги одбија повиците да се предадат. Тие потоа беа заробени и подоцна разменети за руски затвореници.