Народниот правобранител Насер Зибери во гостување во рубриката „Да си кажеме“ во Утринската програма на Телма, вели дека најболно останува прашањето на здравствената заштита на затворениците.

„Во одредени затвори се соочуваме со пребројност. Затворот во Штип, затворот во Прилеп, одделни оддели во затворот во Идризово, и тоа со сериозни проблеми во однос на сместување. Слична е состојбата и во затворот во Скопје каде што имаме и притворско одделение. Но, најболно останува прашањето на здравствената заштита на затворениците. Здравствената заштита и покрај сите наши укажувања, и покрај посебните извештаи поднесени до министерствато како надлежен орган за изведување на здравствена заштита на затворениците, не постигнавме за жал подобрување на резултатите. Затворите се соочуваат со намален недостаток на кадар, лекари, медицински сестри, услови за работа, лекарства“, изјави Зибери.