Вардар конечно ја прекина ужасната низа од седум порази по ред во Лигата на шампиони и тоа со фантастична победа на гостувањето кај лидерот во групата Монпелје со 25-28. Новиот тренер Давид Дејвис очигледно внесе свежина во играта на „црвено-црните“, кои настапија без Борко Ристовски, Марко Мишевски и Анте Гаџа.

Интересно е тоа што црната серија на македонскиот шампион во елитата почна со Монпелје, а вечерва и заврши со овој тим. Вардар имаше контрола на натпреварот речиси сите 60 минути. По 7-7, нашиот состав направи серија од 0-4 и стигна до првата опиплива предност. На полувремето беше 10-13 за Вардар.

Во вториот дел, избраниците на Дејвис имаа уште една серија од 0-4 по која стигнаа и до најубедливата предност од осум голови или 14-22. Монпелје притисна силно, особено во последните неколку минути, но Вардар не дозволи пресврт и ја запиша третата победа оваа сезона во Лигата на шампиони со 25-28.

Голманот Мартин Томовски блескаше на голот со 13 одбрани. Оливие Њокас постигна пет гола, додека Стојанче Стоилов реализираше четири. Иго Деска со седум голови беше најдобар кај францускиот состав.

За седум дена Вардар во Скопје го пречекува Загреб во рамки на 12.коло.