Раководството на Барселона веќе има изработено план според кој во текот на летниот преоден рок ќе може да се ангажираат планираните засилувања.

Според пишувањето на медиумите во Шпанија, Каталонците составиле листа од пет фудбалери кои по завршувањето на сезоната ќе може да го напуштат клубот, а станува збор за Ансу Фати, Рафиња, Феран Торес, Франк Кесие и Ерик Гарсија.

Првите проценки говорат дека од трансферите на овие пет фудбалери ќе се инкасира најмалку 90 милиони евра што ќе биде доволно да се задоволи финансискиот фер плеј што ќе овозможи регистрација на нови играчи за следната сезона.

Приоритет за челниците на Барселона е комплетирањето на трансферот на Лионел Меси, но и ангажирање на Илкај Гундоган, Виктор Роке и уште неколку фудбалери кои се наоѓаат на листата на потенцијални засилувања.

Во Барселона очекуваат и корекција на правилата за финансиски фер плеј во Ла Лига бидејќи по заминувањето на Кристијано Роналдо и Лионел Меси од Шпанија драстично се намалија приходите од телевизиски права, а со доведување на нови ѕвезди во клубовите се очекува и зголемен интерес за емитување на директните преноси.

ФОТО: Игор Паневски