Рубен Селес ќе го води Саутемптон во битката за опстанок во Премиерлигата до крајот на актуелната сезона. „Светците“ денеска официјално го назначија младиот шпански стратег за менаџер, откако изминатиот викенд го водеше тимот до сензационална победа од 1-0 на гостувањето кај Челси.

Селес е третиот менаџер на клупата на тимот од „Сент Мери“, по Ралф Хазенхитл и Нејтан Џоунс. За 39-годишниот Шпанец ова е прва работа како главен тренер, бидејќи претходно му беше помошник на Хазенхитл, а претходно има работено во стручните штабови во помали клубови како Шињик Јарослав, Нефчи и Карабах од Азербејџан потоа, Архус и Копенхаген во Данска, норвешки Штромгосет, а има работено и со тимот до 18 години на Валенсија.

Саутемптон моментално е на последното место на табелата во Премиерлигата со 18 бодови, а утре игра дерби за опстанок на гости кај претпоследниот Лидс јунајтед.