Челниците на Челзи се задоволни од настапите на Жоао Феликс и според пишувањето на медиумите во Велика Британија тие ќе се обидат во текот на летниот преоден рок целосно да го откупат договорот со Атлетико Мадрид.

Жоао Феликс на Стемфорд бриџ дојде во текот на јануарскиот преоден рок и во овие шест месеци има статус на позајмен играч.

Со оглед на фактот дека шпанскиот клуб за предвремен раскин на договорот со Португалецот бараат сума од 100 милиони евра, Челзи како дел од трансферот го нудат репрезентативецот на САД, Кристијан Пулишиќ.

Жоао Феликс по секоја цена сака да си замине од Атлетико, а како причина се наведува незадоволството од статусот кај тренерот Диего Симеоне и неговата судбина зависи и од иднината на шефот на стручниот штаб.

Покрај Челзи, Жоао Феликс е на листата на желби на Манчестер Јунајтед и Пари Сен Жермен.

ФОТО: Игор Паневски