На мастерс тенискиот турнир во Шангај денеска дел од главните фаворити без проблеми стигнаа до четвртфиналето, но елиминација дожиевеа вториот носител. Меѓу најдобрите осум се Новак Ѓоковиќ, Карлос Алкараз, Јаник Синер и Данил Медведев.

Ѓоковиќ до своето 10-то четвртфинале на мастерсот во Шангај дојде откако го реши Роман Сафиулин во два сета со 6-3 и 6-2. Четирикратниот шампион на овој турнир во следната рунда ќе се соочи со Јакуб Менсик, кој пак го изненади Григор Димитров во три сета со 6-3, 3-6 и 6-4. Интересно, Чехот со 19 години стана најмладиот четвртфиналист во историјата на турнирот во Шангај.

Првиот фаворит Јаник Синер со 6-4 и 7-6 го совлада Бен Шелтон и во четвртфиналето ќе игра со Данил Медведев, кој пак беше подобар од Стефанос Циципас со 7-6 и 6-3.

Карлос Алкараз со 6-4 и 7-5 го елиминираше Гаел Монфис и за ривал во четвртфиналето го доби Томаш Махач, кој во три сета го изненади 11-тиот носител Томи Пол.

Тејлор Фриц исто така се пласираше во четвртфиналето по убедливата победа од 6-1 и 6-2 против Холгер Руне, а негов ривал ќе биде Давид Гофан, кој сензационално го елиминираше вториот носител Александер Зверев во два сета со  6-4 и 7-5.