Лос Анџелес лејкерс и натаму не можат да сметаат на Лука Дончиќ, кој продолжува со рехабилитацијата по повредата на задната ложа. Словенецот и официјално нема да биде во составот за третиот натпревар против Оклахома во плеј-офот.

Дончиќ сè уште не е подготвен за настап, иако веќе почна со лесни тренинзи, трчање и шутирање. Сепак, тој и натаму не може целосно да му се приклучи на тимот. Поради тоа, ќе го пропушти третиот натпревар против Оклахома во полуфиналето на Западната конференција, односно првиот дуел на домашен терен во оваа серија. Под голем знак прашалник останува и неговиот настап на четвртиот натпревар.

Словенецот ја повреди задната ложа на 4 април, а според првичните информации требаше да паузира околу осум недели. Тој замина и на специјална терапија во Мадрид во обид да ја забрза рехабилитацијата, но сè уште не е подготвен да се врати на паркетот. Тоа значи дека Лејкерс најверојатно ќе мораат и натаму без негова помош против актуелниот шампион.

Доколку тимот од Лос Анџелес приреди големо изненадување и ја елиминира Оклахома, тогаш Дончиќ би можел да биде подготвен за настап во конференциското финале.