Легендарниот скијач Марсел Хиршер доживеа нова тешка повреда на коленото и најави дека ова можеби е крај на неговата трофејна кариера.

Австриецот, кој од оваа сезона почна да се натпреварува под знамето на Холандија, се подготвуваше за кам-бек во Светскиот куп во алпско скијање, но заработи повреда на предните вкрстени лигаменти на коленото за време на еден тренинг во Австрија.

Сезоната за него е сигурно завршена, а 35-годишниот скијач најави дека можно е да стави и крај на кариерата.

„За несреќа повредите се дел од скијањето. Можеби конечно сум готов со моето патување“, рече Хиршер. 

Интересно е тоа што Австриецот првично се повлече од спортот во 2019 година, како најуспешен скијач на сите времиња со дури осум титули во генерален поредок во Светскиот куп и тоа освоени по ред, а имаше и две олимписки злата и едно сребро, како и седум златни медали на Светските првенства.