Македонската женска ракометна репрезентација со триумф го отвори настапот на Светското младинско првенство што се одржува во Скопје. Избраничките на селекторот Љубомир Савевски на стартот го совладаа Сенегал со 32:13.

Мечот во А1 арената Борис Трајковски доцнеше еден час бидејќи Сенегалките не успеаа навреме да стигнат во Скопје и веднаш по слетувањето на авионот од Истанбул дојдоа во салата.

И покрај фактот што гостинките беа видно преморени од патувањето, сепак репрезентацијата на Сенегал не можеше да и парира на репрезентацијата на Македонија која од самиот почеток доминираше на теренот и имаше целосна контрола на она што се случуваше на теренот.

Најефикасни во македонската селекција со пет постигнати гола беа Теодора Дукоска, Борјана Коцева, Бојана Коцева и Емилијана Ризоска додека голманките Матеа Чурлиновска и Марија Јовановска комбинирано забележаа 13 интервенции.

Во вториот меч од нашата Б група, Иран го совлада Узбекистан со 47:31.

В недела репрезентацијата на Македонија во терминот од 20 часот и 30 минути исто така во А1 арената Борис Трајковски ќе се соочи со Узбекистан.

ФОТО: Игор Паневски