Гоце Седлоски е нов тренер на фудбалскиот клуб Вардар. Поранешниот македонски репрезентативец е вкупно четвртиот тренер на „црвено-црните“ сезонава и ќе се обиде да го извади тимот од дното на табелата во Првата македонска фудбалска лига.

По разделбата со Срѓан Захариевски вчера, Вардар експресно го назначи Гоце Седлоски за нов тренер. Стратегот се враќа на клупата на „црвено-црните“ каде што седеше од 2015 до 2017 година и освои две шампионски титули.

Минатата сезона тој последно работеше во Работнички, а беше тренер и на Шкупи и Турново во домашното првенство. Во странство ги водеше тимовите на Влазнија од Албанија, потоа Рига, Широки Бријег и вториот тим на Динамо Загреб.

Вардар сезонава е на последното место на табелата во Првата лига со само осум бодови, а освен Срѓан Захариевски на клупата седеа и Горан Петревски и Горазд Михаилов.