Соединетите Американски Држави пресретнале разузнавачки информации што укажуваат дека Израел подготвува напад врз иранските нуклеарни постројки, во време кога администрацијата на Доналд Трамп се обидува да постигне дипломатски договор со Техеран, објави „Си-Ен-Ен“, повикувајќи се на изјави на повеќе американски претставници.

Според нив, таков напад би бил јасно кршење на политиката на претседателот Трамп и би можел да предизвика поширок регионален конфликт на Блискиот Исток, нешто што Вашингтон се обидува да го избегне уште од почетокот на војната во Газа во 2023 година..

Иако не е јасно дали израелското раководство донело конечна одлука, постојат длабоки поделби во рамки на американската администрација околу тоа дали Израел воопшто ќе дејствува. Меѓу другото, американските служби забележаа преместување на воздушното оружје и завршување на големите воени вежби во Израел, што би можело да биде и порака до Техеран за сериозноста на заканата или едноставно обид за создавање притисок.