Вчера 1068 граѓани дошле да примат трета вакцина по одлуката на Комитетот за имунизација – да се скрати времето за поттикнување на имунитетот кај оние вакцинирани со кинеската Синофарм. Стручните лица увиделе дека токму таа вакцина поттикнала послаб имун одговор и тоа кај повозрасните лица, па затоа сега дозволуваат граѓаните кои најдоцна во средина на јули го заокружиле вакциналниот процес со примени две дози, да отидат во некој од пунктовите и да примат вакцина. Министерот за здравство вели дека оваа одлука се одлука којашто се базира на студии.

Вакцината на производителот „Фајзер“ е наменета за трета доза кај оние што ќе ја примат, независно каква добиле претходно. Македонските државјани кои спаѓаат во некоја од категориите, а се вакцинирани во странство, ќе мораат најпрво да одат на пункт за вакцинација и да бидат внесени во националниот систем како имунизирани граѓани. Информациите од извештајот на здравствените власти за периодот од 8 до 14 октомври,  покажуваат дека од 105 починати 26 биле вакцинирани и сите освен еден биле со хронични заболувања. Од 26-те лица, најмладиот починат е 48-годишно лице со кардиолошко и белодробно заболување и дијабетес. Од вакцинираните починати, едно лице, немало хронично заболување и имало 80 години, соопшти Министерство за здравство. Двајца од починатите пациенти биле вакцинирани со вакцината на „Фајзер“, тројца со „АстраЗенека“, четири починати пациенти со Ковид-19 примиле вакцина „Синовак“, а 17 пациенти примиле вакцина од „Синофарм“. Инаку, првиот човек во здравството информираше и дека скринингот на средношколците започна и се одвива без никакви проблеми, согласности од родителите пристигнуваат секој ден, а до крајот на оваа недела ќе се тестираат и до 500 деца. Се тестираат деца во средните училишта и во основни училишта, а ниту едно дете не добило позитивен резултат на тестот.

 Петар Догов