Девин Нунес, поранешниот конгресмен кој ја води компанијата „Truth Social“, отпатува во Северна Македонија во време кога Доналд Трамп повторно е во трка за претседател на САД, со цел да се сретне со Христијан Мицкоски, вака започнува сторијата на истражувачките новинари од порталот Propublica.

Претходно ова лето, Девин Нунес, извршен директор на „Трамп Медиа“ и поранешен конгресмен од Калифорнија, дојде во Скопје, главниот град на Северна Македонија.

Тој и мала група други северноамерикански директори беа таму за да разговараат за бизнисот. Но, тие не беа таму за да се сретнат со претставници од друга компанија. Пред нивниот приватен авион ги пречека висок функционер од македонската влада. Потоа поворката за следеше  полициска придружба. Тие беа таму за да се сретнат со новоизбраниот премиер на Северна Македонија.

Во тоа време, премиерот Христијан Мицкоски, лидерот на конзервативната националистичка партија ВМРО – ДПМНЕ, не даде многу детали за целта на состанокот: „Засега, не би открил повеќе детали“, им рече тој на новинарите.

• „На средбата се разговараше за можностите за соработка во дигиталниот сектор и дигиталните реформи кои треба да ги спроведе нашата држава со цел да се подобрат услугите кон граѓаните и поедноставување на нивниот живот фокусирајќи се на дигиталната слобода и трансформација на македонското општество. Исто така, беа разговарани повеќе можности за економска соработка во различни области во државата“, објави македонската Влада.

Мицкоски во интервју за Телма потврди дека во делегацијата американски бизнисмени биле луѓе многу блиски до Трамп.

• „Станува збор за корпорации со десетици милијарди долари годишен обрт. Крис Павловски е со македонско потекло, тој работи заедно со тимот на господинот Трамп во делот на развивање на ‘Рамбл“ (Rumble), која е многу важна во процесот на дигитализација, а луѓето кои беа тука, господинот Хауард и господинот Нунес, се двајца кои се од кругот на најблиските соработници на експретседателот на САД, Доналд Трамп, и тоа се луѓе со големо корпоративно и политичко искуство во делот на дигитална трансформација“, изјави Мицкоски во интервју за ТВ Телма (22.07.2024).

Во неодамнешниот повик за соработка, Крис Павловски, кој го придружуваше Нунес на патувањето и кој е извршен директор на „Rumble“, компанија за видео стриминг и близок партнер на фирмата „Трамп Медиа“, откри дека разговарал за договор за услуги од областа на технологијата со македонската влада.

Корпорации блиски до Трамп, со десетици милијарди долари годишен обрт, ќе бидат вклучени во дигиталната трансформација – Мицкоски во „Топ тема“

Како што пишува Propublica.org, во своите јавни коментари, премиерот Мицкоски се пофали со политичките врски на делегацијата која му беше во посета. Тој ги опиша Нунес и уште еден присутен како „двајца од најблиските соработници на поранешниот претседател на САД Доналд Трамп“.

Фирмата на Трамп влегува во дигитализација – премиерот Мицкоски оствари средба со претставници на компанијата „Рамбл“

Додека Трамп се кандидира за втор мандат, експертите предупредија дека неговиот удел во „Trump Media“ и неговата платформа слична на „Твитер“, „Truth Social“, се всушност можности за влијание. Огласувачите, продавачите или инвеститорите кои имаат политички агенди би можеле да ги искористат своите деловни односи со овие социјални медиуми за да бараат поволен третман од администрацијата на Трамп.

Портпаролот на „Трамп Медиа“ не одговори на прашањата за тоа каква улога може да има компанијата во таков договор или дали е постигнат.

Портпаролот даде изјава во која се вели: „Генијалците на ProPublica, на наше вознемирување, го открија тајниот план на Девин Нунес да ја обнови империјата на Александар Велики и да го прогласи Крис Павловски за крал на Македонија“.

Ако македонската влада се договори со „Трамп Медиа“ или нејзините партнери и Трамп повторно биде избран за претседател, тоа би можело да биде уште еден пример во кој неговите приватни деловни интереси се вкрстуваат со надворешната политика на САД, пишува Propublica.org.