Соединетите Американски Држави привремено ги укинуваат санкциите за иранската нафта која моментално се наоѓа на море, дозволувајќи ѝ да биде продадена на повеќето земји со цел да се задржат ниски цените на нафтата.

Министерот за финансии на САД, Скот Бесентизјави дека ова „краткорочно одобрување“ ќе овозможи околу 140 милиони барели нафта да влезат на глобалните пазари. Изјавата беше објавена на мрежата X во петокот.

Бесент додаде дека Иран ќе има „потешкотии да пристапи“ до финансиската добивка од продажбата.

Тој нагласи дека дозволата е „строго ограничена само на нафта што веќе е во транспорт и не дозволува нови набавки или производство“.

„Во суштина, ќе ги користиме иранските барели против Техеран за да ја задржиме цената ниска“, додаде тој.

Цените на нафтата и гасот значително пораснаа од почетокот на војната, како и по иранските напади врз енергетската инфраструктура на Блискиот Исток.

Цената на сировата нафтасе движи околу 112 долари за барел, што е зголемување од 3% во петокот и 53% во изминатата година.