Во Обединетото Кралство е на сила црвено предупредување за екстремна топлина, откако метеоролозите најавија дека температурите во следните денови би можеле да достигнат или да се доближат до 40 степени Целзиусови.

Највисоки вредности се очекуваат во Лондон и југоисточна Англија. Британските власти предупредуваат дека жештината може да има сериозни последици по здравјето на населението, како и врз инфраструктурата, енергетскиот систем и водоснабдувањето.

Агенцијата за безбедност на здравјето издаде црвени и жолти предупредувања за поголем дел од земјата.

Поради екстремните услови, стотици училишта се затворени или работат со скратено време, а дел од железничките линии се суспендирани или намалени.

Дел од операторите ги повикаа граѓаните да избегнуваат патување поради ризик од дефекти на инфраструктурата.