Утринската дојава за поставена бомба во зградата на Меѓународниот аеродром во Сараево се покажа како лажна, по спроведената контрадиверзантска проверка од страна на безбедносните служби на Босна и Херцеговина.

По примањето на дојавата, зградата на аеродромот беше привремено блокирана, а патниците и вработените беа евакуирани како превентивна мерка. Припадници на Граничната полиција на БиХ и специјализирани служби извршија детална проверка на објектот, при што не беа пронајдени никакви опасни предмети.

Од Меѓународниот аеродром Сараево (Međunarodni aerodrom Sarajevo) за босанските медиуми потврдија дека безбедносната процедура е завршена и дека авионскиот сообраќај е постепено нормализиран, без подолги доцнења на летовите.

-По извршената контрадиверзантска инспекција, утврдено е дека дојавата била лажна. Аеродромот продолжи со работа согласно безбедносните протоколи“, пренесуваат федералните медиуми во БиХ, повикувајќи се на официјални извори.

Надлежните институции работат на утврдување на потеклото на лажната дојава, а случајот се третира согласно законските процедури за загрозување на јавната безбедност и лажно пријавување.