Војната во Израел беснее веќе две недели, а опасноста конфликтот да се прелее и на други територии станува се поголема.

Европа стравува дека поради ваквата ситуација можно е ширење на терористички напади на нејзина територија.

Поради оваа причина, многу европски земји посегнаа кон воведување драстични мерки, ставајќи го слободното движење меѓу државите од шенген зоната во ризик.

Имајќи предвид дека мнозинството арапски земји од Блискиот Исток ја поддржуваат Палестина и бараат од Израел итен прекин на гранатирањето на Газа, како и дека другите милитантни организации како Хезболах и Исламски џихад, како и самиот Иран, се закануваат со влегување во конфликтот во случај на копнена инвазија на Газа, светот оправдано се плаши од прелевање на насилството.

Поради стравот од поголема ескалација, Австрија го суспендираше шенген режимот на границата со Чешка, Германија на границата со Чешка, Полска и Швајцарија, Италија на границата со Словенија и Словенија на границата со Хрватска и Унгарија.

Австрија пак распореди и голем број воен персонал на улиците на Виена, стравувајќи од можни терористички напади.