Билјана Тодоровска од Битола е млада жена со телесен инвалидитет, која низ градот се движи со електричен скутер. Иако вели оваа превозно средство значително и ја зголеми мобилноста, сепак физичките бариери се сè уште големи, но уште потешко ги доживува менталните препреки – предрасудите и дискриминацијата.

Билјана вели Битола е град во кој нема услови за лицата со телесен инвалидитет, затоа што не само улиците, непристапни за нив се институциите, објектите за културни настани, трговијата.

„Најголема пречка е непристапноста на улиците во градот. Ова е 21 век, 2024 година, никаде нема пристап. Само на Широк Сокак, другите улици се со високи тротоари, со барикади. Секојдневно се соочуваме со многу пречки. За жал и менталитетот ни е на ниско ниво, но и бариерите ни се многу големи“, вели Билјана Тодоровска од Битола.

Здружението на лица со телесен инвалидитет „Мобилност“ од Битола и денеска го организираше традиционалното дефиле по битолски Широк Сокак со единствен мотив да го свртат вниманието на надлежните за нивните проблеми. Побараа подобра пристапност до институциите и вистинска, наместо декларативна поддршка.

„Најголема пречка претставува непристапноста до јавните објекти. Нема мобилност, нема движење без пристапност. За жал на  сите наши апели државата и заедницата  тешко ги прифаќаат“, вели д-р Нико Јанков, претседател на здружението „Мобилност“ од Битола.

Во здружението „Мобилност“ во Битола членуваат околу 1.200 лица со телесен инвалидитет. Најмногубројна е популацијата која е најактивна во животот, но овие луѓе немаат можност да бидат рамноправни членови на општество.

Емилија Мисирлиевски