Православните верници денеска го слават празникот Богојавление.
На овој ден, според христијанската религија, Свети Јован Крстител го крстил Исус Христос во водите на реката Јордан.
Празникот се нарекува уште и Водици поради осветувањето на водите на овој ден.
Одбележувањето на празникот почна со архиерејска божествена литургија во храмот „Рождество на Пресвета Богородица“.
Во Скопје настанот и годинава се одбележува со положување на светиот крст во водите на реката Вардар кај мостот „Слобода“.
Крстот го фати Христијан Нинески, кој на сите луѓе им посака добро здравје и среќа. Тој кажа и дека трет пат го фатил крстот од вкупно осум обиди во минатите години.
Крстот во реката Вардар го фрли поглаварот на Македонската православна црква – Охридска архиепископија, Г.Г Стефан.
Фрлањето на крстот во Вардар го следеа голем број верници и граѓани.
