Институтот за јавно здравје на Македонија издаде препораки за граѓаните во врска со најавениот недостиг на вода во Скопјe. Ги повикаа сами да си направат залиха според потребите, не помалки од 4 литри по лице на ден.

Ги советуваат да наполнат резерви и истите штедливо да се трошат само за основни потреби, а да се одложат сите други активности кои не се неопходни а за кои е потребно користење вода. За одржување на хигиената препорачуваат да се користи средство за дезинфекција на раце и влажни марамчиња.

Од ИЈЗ повикуваат да се готват оброци за кои не е потребна вода при подготовката, а наместо керамички да се користат садови за една употреба. Ги повикуваат граѓаните да ги следат насоките на властите и да ги почитуваат препораките.

Апелираат да им се помогне на ранливите категории како стари и изнемоштени лица и лица со здравствени проблеми. Препораките за здравствените установи пак вклучуваат обезбедување резерви на вода и прилагодување на медицинските процедури.