Крадци провалиле во трезор на банка во германскиот град Гелзенкирхен и украле имот вреден десетици милиони евра од сефови на клиенти, соопшти полицијата.

Кражбата се случила вчера рано наутро, за време на празничниот период, а погодени се околу 2.700 клиенти на банката „Шпаркасе“.

Според полицијата, сторителите издупчиле отвор во подрумскиот ѕид на трезорот со голема бушалка, по што ги испразниле сефовите. Се проценува дека штетата изнесува меѓу 10 и 90 милиони евра, што овој случај може да го направи еден од најголемите грабежи во Германија.

Сведоци пријавиле дека виделе неколку маскирани лица како носат големи торби во блиска гаража, а безбедносни камери снимиле осомничени во украдено возило. Банката останала затворена и следниот ден, додека истрагата продолжува.