Во Основниот кривичен суд во Идризово денеска продолжува судскиот процес за трагичниот пожар во дискотеката „Пулс“ во Кочани.

На рочиштето се разгледуваат нови материјални докази предложени од Обвинителството, поврзани со инспекциски надзори и теренски контроли пред несреќата.

На претходните рочишта беа презентирани документи за работата на општинските и градежните инспектори, вклучувајќи извештаи, овластувања и записници од контроли.

Овие материјали се дел од доказниот процес за утврдување на околностите пред избувнувањето на пожарот.

Одбраната останува на ставот дека обвинението е прешироко и опфаќа премногу лица и дејствија. Постапката продолжува со цел целосно расветлување на една од најтешките трагедии во поновата историја на земјата.