Конвојот на Светската програма за храна блокиран од израелската армија на влезот во Појасот Газа, ограбен од „очајни луѓе“, соопшти агенцијата на ОН.

Светската програма за храна со седиште во Рим соопшти дека 14 камиони со околу 200 тони храна чекале околу три часа на контролниот пункт Вади Газа, во Зејтун, на југоисток од енклавата, но не им било дозволено да одат понатаму.

Агенцијата соопшти дека ги разгледува сите средства за испраќање помош во Појасот Газа.

ОН проценуваат дека 2,2 милиони луѓе, огромното мнозинство од населението на енклавата, се на работ на глад, особено на северот, каде што израелските сили го спречуваат влегувањето на помошта.

Агенцијата денеска објави дека гладот ​​во енклавата на север достигна „катастрофални размери“.

САД бараат Советот за безбедност на ОН да го поддржи нивниот план за прекин на огнот во Газа

Соединетите Американски Држави го ревидираа текстот на нацрт-резолуцијата на Советот за безбедност на Обединетите нации за поддршка на итен прекин на огнот, кој би траел приближно шест недели во Газа, заедно со ослободување на сите заложници.

Третата ревизија на текстот, во кој увид имале „Ројтерс“, ги одразува острите забелешки на потпретседателката Камала Харис.

Вашингтон до сега стави вето на три нацрт-резолуции на Советот – од кои две бараа итен прекин на огнот – за време на петмесечната војна.

Неодамна, САД го оправдаа своето вето велејќи дека таквата акција на Советот може да ги загрози напорите на САД, Египет и Катар да посредуваат за пауза во војната и ослободување на заложниците.

Американскиот претседател Џо Бајден вчера рече дека од Хамас зависи дали ќе го прифати договорот за прекин на огнот бидејќи делегациите одржаа трет ден од разговорите без знаци за напредок.

САД традиционално го штитат Израел во Обединетите нации, но исто така двапати се воздржуваа, дозволувајќи му на Советот да усвои резолуции насочени кон зголемување на помошта за Газа и повикување на продолжена пауза во борбите.