Премиерот во Коњско, гевгелиско, опозицискиот лидер во Карбинци, штипско. Ковачевски и Мицкоски денеска беа со километри далеку од гробот на Гоце Делчев.

Делегациите што ги испратија, одбија да дадат изјави. Молчалив беше и претседателот Стево Пендаровски, кој единствен од државниот врв,  положи свежо цвеќе на гробот на револуционерот. Подоцна на фејсбук кусо напиша дека Делчев „е стожерот врз кој се гради македонската државност и самобитност„.

За Ковачевски, нема подобро место за чествување на револуционерот од браната Коњско.

Лежерно беше и во Карбинци. Мицкоски не го ни спомна Делчев, човекот за кој два часа претходно на фејсбук напиша дека „беше пред времето и го даде животот за Македонија„.

Почит на револуционерот утрово му оддадоа  бројни делегации од институти и здруженија од Македонија и странство, кои се противат на преговорите за заедничко чествување на Гоце Делчев со Бугарија.

Чествувањето помина мирно и без инциденти, со бројно полициско обезбедување.

Далиборка Демјанска Цветановска