Со одлука на Владата, за директорка на Инспекторатот за македонски јазик е назначена Менче Андреева, од Велес . Таа е лиценциран лектор по македонски јазик , а до сега работела во ОУ „ Рајко Жинзифов“, во велешкото село Горно Оризари.

Со назначувањето на Андреева за директор на Инспекторатот за македонски јазик, се очекува да започне примената на Законот за употреба на македонскиот јазик. Тој беше изгласан во Собранието лани, кон крајот на јануари и до сега практично не е започната неговата примена.

Инспекторатот за македонски јазик треба да ја надгледува примената на Законот за употреба на македонскиот јазик во државните институции, органите на државната управа и во медиумите. Инспекторатот има задача да опоменува, но и да казнува доколку не се применуваат одредбите од Законот за употреба на македонскиот јазик. Тој предвидува задолжително лекторирање на документи и други материјали, но и задолжително вработување лектори во институциите и медиумите.

Текстот на Предлогот-Законот за употреба на македонскиот јазик го подготви претходниот состав на владиното тело- Совет за македонски јазик и министерството за култура , под раководство на претходната министерка Бисера Костадиновска-Стојчевска.