Ме мотивира интензитетот на чувствата од музиката, среќната публика и размената на позитивна енергија. Вака нашиот пијанист со светски реноме, маестро Симон Трпчески, го објаснува мотивот во набиената агенда концерти низ регионот и светот, на 20 декември во арената „ Борис Трајковски“ да одржи новогодишен концерт, за прв пат во кариерата. Вели, таков концерт, кој вклучува светски класици и популарни нумери од интернационални ѕвезди и домашни изведувачи, за кои аранжманите ги направи Панде Шахов, му била дамнешна желба.

• И ми е мило што со овој концепт на поврзување на класиката и на овие поп, полесни класици, варијанти или композиции, да ја доближиме уште повеќе публиката. Но, и она што за сите нас е најважно – децата и иднината на општеството, рече маестро Симон Трпчески, пијанист.

Во првиот дел од концертот ќе биде изведена „Свита“ од балетот „ Оревокршачка“ на Чајковски. Во четирирачната изведба, на Трпчески ќе му се придружи неговиот поранешен студент Шќелзен Бафтиари. Ќе настапат првенците на Македонскиот Балет- Марија Кичевска и Бобан Ковачевски и други балетски уметници од МОБ. А, во вториот дел ќе се чујат дела од Лехар, Штраус, Моцарт и Верди, со учество на музичари од ансамблот „ Македонисимо“.  Ќе бидат изведени во ново руво и нумери од Дин Мартин, Френк Синатра, Неткин Кол, Мараја Кери и Мајкал Бубле. А, ќе настапат сопранот Гонца Богоромова – Краповски и баритонот Иван Наумовски. Па, виртузот на пијано побара од државата поголема поддршка за домашните таленти.

• Треба да се подобри целосниот државен концепт воопшто, на поддржување на македонските уметници од најразлични правци во уметноста и културата, генерално, рече Трпчески.

Новогодишниот концерт на Симон Трпчески е во организација на „ Прагма продукција“.

• Концертот, предновогодишен што ќе биде буквално за сите. Значи, нешто што ќе го разберат и тие што ја разбираат класичната музика и тие што не ја разбираат, кажа кристијан Стефановски од „ Прагма продукција“.

И покрај тоа што ќе се одржи во спортска сала, звукот на концертот ќе биде совршен, зашто за него се грижат инженери од компанијата од каде е изнајмена опремата, дополни Стефановски.

Сотир Трајков