Предлог-измените на Законот за данокот на додадена вредност го поминаа првото читање во собраниската Комисија за финансирање и буџет. Со предложените измени се укинува ослободувањето од ДДВ за мали комерцијални пратки до 22 евра испорачани од странство, со цел, како што посочи заменик-министерот за финансии Николче Јанкуловски, да се создаде појасна правна рамка и да се спречат злоупотреби.Ослободувањето до 22 евра останува само за лични, некомерцијални пратки меѓу физички лица, но со исклучоци за алкохол, парфеми и тутунски производи. Јанкуловски потсети дека Европската унија уште во 2021 година го укина ваквото ослободување за комерцијални пратки, а предложените измени треба да обезбедат пофер услови за бизнисите во земјава. Дел од опозицијата го оцени предлогот како политички изговор што ќе го погоди населението со најниски приходи.