Во петок здравствените работници излегуваат на протест. Револтирани се поради фактот дека ниту Министерството за здравство, ниту пак Министерството за финансии имаат слух за нивните барања. Велат дека ќе ги радикализираат протести со излегување на улица.

За време на пандемијата со Ковид 19 бевме херои, за потоа да се заборави на сето тоа, револтирано реагираат членовите на Независниот синдикат на здравствени работници. Тие ги повторија своите барања за зголемување на платите за 30%, нов колективен договор, бенефициран работен стаж, зголемување на инфективниот додаток од 1 на 4% и трансформација на определено работно време со неопределено. Во петок излегуваат на протест што ќе се одвиваа на работните места за време на паузите од 10:30 до 11:00, воедно упатија и апел до Владата.

Ако го сакате народот и ако се грижите за неговото здравје, треба да се грижите и за нас, кои го чуваме здравјето. Да дојдете да видите во какви услови работиме и колку можеме ние да им понудиме во текот на еден ден, со тој капацитет кој што го имаме и со тој персонал за едно нормално хумано лекување на луѓето. Ако навистина ги сакате и се грижите за нив. Да видите што се правиме за пациентите кога ќе дојдат. – изјави Кристина Олевска, претседателка на Независниот синдикат на здравствени работници за ГОБ 8 Септември-Скопје

Расте незадоволство и кај голем број здравствени работници во различни делови на земјава, смета Костовски.

Во Здравствен дом Крушево имаат воведено смена од 12:00 до 20:00 часот која е спротивна на Законот за работењето на здравствените домови и се врши одрден притисок врз наши членови, кои иако си ги извршуваат совесно своите задачи, кога одат со своите возила за Итна медицинска помош по други клинички центри вишок часовите не им се исплаќаат. – вели Лазар Костовски, претседател на Независен синдикат на геријатрија

Тие упатија три предлога до Министерството за здравство и до Фондот за здравство како да си го зголемат буџетот за да бидат исполнети барањата на независниот синдикат на здравствени работници:

Еден од нашите предлози е оданочување на високата плата на функционерите, која е енормно висока за овие услови, стандард во кој се наоѓа Македонија. Оданочување од 30 до 40% на функционерската плата. Или т.н солидарен фонд.  – истакна Боби Бојчевски, национален координатор за здравство на КСОМ 

Вториот предлог на Независниот синдикат на здравствени работници е здравствените установи да се ослободат од плаќање индустриска вода и струја,  третиот предлог кој го нудат е укинување на економските директори.  Доколку и овој пат Министерството за здравство и Министерството за финансии немаат слух за нивните барања велат дека ќе ги радикализираат протестите и ќе излезат со протест пред Влада.

Нина Стефанова