Ниту четириесет дена на функцијата не и беа доволни на градоначалничката на Град Скопје Данела Арсовска да најде за потребно да застане пред камерите на медиумите и да ги одговори на јавноста големиот број прашања кои се наметнуваат секојдневно. Наместо тоа, таа денес свика новинарски брифинг и информираше за дел од тековните градски работи. Новогодишните празници наближуваат, а многу работи околу украсувањето и прославата биле ставени на чекање заради изминатите избори, па дел и на тоа го припиша Арсовска задоцнетото украсување. „Винтерленд“ вели дека и годинава ќе има – но, двојно поевтино од тоа што го чинеше поранешниот градоначалник Шилегов во минатото, а Новата година ќе се дочека со македонски музичари со кои во моментов се преговара.

Иако едно од главните предизборни ветрувања на Арсовска беше бесплатен јавен превоз за сите, таа сега најави дека тоа може да се реализира најрано за две години, а ќе почне од 1 јануари со бесплатно користење на автобусите за оние категории граѓани на кои во меѓувреме ова им било ускратено како пензионерите и лицата со попреченост. За истото информираше и новиот директор на ЈСП кој најави и враќање на ноќните линии, но и повеќе автобуси на градските улици.

Во меѓувреме, градоначалничката информираше за ревизија во тек, на сите проекти и функционери од претходната градска власт затоа што тврди дека ја затекнала касата со 50 милиони долг и во лоша финансиска состојба – нешто за што засега нема реакција од нејзиниот претходник. Арсовска тврди дека за тоа имала и закани од луѓе, за како што вели, да не ги открие постапките за незаконско работење на нејзините претходници.

Петар Догов