Италија нема да го обнови својот одбранбен договор со Израел, изјави италијанската премиерка Џорџа Мелони.

Мелони рече дека нејзината влада одлучила да го суспендира обновувањето, кое се случува на секои пет години, „со оглед на актуелната ситуација“, без да прецизира на што точно мисли.

Но, во односите меѓу Рим и Тел Авив од неодамна се појавија сериозни тензии.

Минатата недела Италија го повика израелскиот амбасадор во Рим, откако израелските сили испукале предупредувачки истрели кон конвој на италијански мировници, дел од силите на ОН во Либан, при што едно возило било оштетено, но немало повредени.

Во понеделникот, пак, Израел го повика амбасадорот на Италија за да протестира против изјавите на италијанскиот министер за надворешни работи Антонио Тајани, откако тој ги осуди „неприфатливите напади“ врз цивили во Либан и изјави дека „уште една ескалација како во Газа мора да се избегне по секоја цена“.

И други европски земји, исто така, го паузираа или ограничија извозот на оружје кон Израел.

Италијанските опозициски партии подолг период бараа Италија да го направи истото.

Во последниве години, стотици илјади Италијанци излегоа на улиците, протестирајќи и штрајкувајќи против постапките на Израел во Газа и против неподготвеноста на Мелони да им се придружи на сè поголемиот број земји што ја признаваат палестинската државност.

Италија е трет најголем извозник на оружје во Израел, според најновите податоци од Меѓународниот институт за истражување на мирот од Стокхолм.

Сепак, тоа е само 1,3% од увозот на оружје на Израел во периодот 2021–2025. САД и Германија остануваат главни снабдувачи на Израел со оружје.