Најмалку 100 смртни случаи се пријавени како жртви на епидемијата на ебола во Демократската република Конго, со повеќе од 390 сомнителни случаи, соопштија надлежните.

Светската здравствена организација  ја прогласи епидемијата за меѓународна вонредна состојба.

Најмалку шест Американци биле изложени на вирусот ебола за време на епидемијата во ДР Конго, потврдиле извори за CBS News.

Се верува дека еден Американец има симптоми, додека тројца други имале високоризичен контакт или изложеност. Не е јасно дали некој од нив е заразен.

Американскиот центар за контрола на болести (CDC) соопшти дека помага во „безбедното повлекување на мал број Американци кои се директно погодени“, но не потврди за колку лица станува збор.

Тековниот вид на ебола е предизвикан од вирусот Бундибугио, за кој нема одобрени лекови или вакцини.

Американската влада наводно разгледува организирање транспорт за малата група Американци во ДР Конго до безбедна локација за карантин, изјавил извор за здравствениот портал STAT.

Според истиот извор, групата би можела да биде префрлена во американска воена база во Германија, иако тоа сè уште не е потврдено.

За време на прес-конференција во неделата, CDC одби директно да одговори на прашања за наводно заразените американски државјани, додавајќи дека ризикот за САД останува низок.

САД, исто така, издадоа предупредување за патување од Ниво 4 – највисоко можно ниво – со кое се советува да не се патува во ДР Конго.

СЗО соопшти дека епидемијата во источната провинција Итури во Конго претставува меѓународна здравствена вонредна состојба, но не ги исполнува критериумите за пандемија.

Агенцијата исто така предупреди дека потенцијално би можело да станува збор за „многу поголема епидемија“ од она што моментално се открива и пријавува, со значителен ризик од локално и регионално ширење.

Повеќе од 28.600 луѓе беа заразени со ебола за време на епидемијата во Западна Африка од 2014 до 2016 година, што беше најголемата епидемија на вирусот од неговото откривање во 1976 година.

Болеста се прошири во повеќе земји во и надвор од Западна Африка, вклучувајќи ги Гвинеја, Сиера Леоне, САД, Обединетото Кралство и Италија , при што животите ги загубија  11.325 луѓе.