Најмалку 14 лица, меѓу кои и Американец, се убиени во руски напади врз Киев во текот на ноќта, изјави украинскиот министер за внатрешни работи, Игор Клименко. Во нападот врз украинскиот главен град се повредени 44 лица, штети се предизвикани на станбени згради, образовни институции и критична инфраструктура, додаде тој на Телеграм.

Експлозии можеа да се слушнат цела ноќ во Киев додека лидерите на седумте најразвиени светски економии беа на Самит на групата во Канада. Главна тема на годинашниот самит на Г7, сепак, беше размената на воздушни удари меѓу Израел и Иран.