Палестинските семејства почнаа да го напуштаат бегалскиот камп Џабалија во северниот дел на Газа, бегајќи од засилениот израелски воен напад врз борците на Хамас во овој дел од земјата.

На колички со магариња или во автомобили, натрупани со душеци и други работи, мажи, жени и деца бегаат пред налетот на израелската војска по уништени улици од борбите во последните седум месеци од војната.

Со вреќа полна со се што и останало, Ум Махмуд рече дека тие бегаат од израелскиот оган и гранатирање што им ги уништи домовите.

„Не го најдов мојот лек и нема што да се јаде“, рече Махмуд. „Нема куќа, нема засолниште, нема храна, нема вода. Нема никој со нас освен Бога“.

ОН соопштија дека повеќе од 100.000 луѓе го напуштиле северниот дел на Газа во последните неколку недели, бидејќи Израел започна нови воени операции во неколку области.

Израелските сили во текот на изминатите седум месеци постојано вршат рации во Џабалија, камп за бегалци од војната, кој се претвори во густо изградена урбана област.

Борбите беа обновени таму овој месец кога Израел рече дека борците на Хамас се прегрупирале во ова населено место.