Социјалната мрежа „Икс“ (X) повторно е достапна во Венецуела. Повеќе од една година, платформата беше блокирана од претседателот Николас Мадуро, кој беше уапсен од американските сили на 3 јануари.

„Го продолжуваме контактот преку овој канал. Венецуела останува на нозе, со сила и историска свест. Да останеме обединети во стремежот кон економска стабилност, социјална правда и држава на благосостојба“, напиша в.д.претседателката Делси Родригез во пораката до јавноста, откако го активира сопствениот налог на „Икс“.

По изборите во јули 2024 година, Мадуро беше прогласен за победник и покрај обвинувањата за изборен фалсификат, по што неговата влада во август го оневозможи пристапот до оваа американска платформа.

Пред забраната, „Икс“ беше клучна платформа за информирање на граѓаните на Венецуела, но блокирањето ги принуди министерствата, пратениците и државните агенции да престанат со објавување содржини на оваа мрежа. Родригез ја презеде власта откако Мадуро и неговата сопруга беа уапсени од американските воени сили на почетокот на овој месец, во операција во која, според официјалните податоци, загинаа над 100 лица.