Новинарите во Пакистан организираа протест во Карачи денеска, осудувајќи го убиството на новинари во Газа од страна на израелските сили, јави АП.

Држејќи транспаренти и извикувајќи слогани против Израел, групата ја повика меѓународната заедница да го спречи Израел да ги таргетира новинарите во тековната војна меѓу Хамас и Израел.

Камерманите ги спуштија своите камери во чест на дописниците на Ал Џезира Анас ал-Шариф, Мохамед Крејкех, снимателите Ибрахим Захер и Мохамед Нуфал и хонорарниот снимател Момен Алива и хонорарниот новинар Мохамед ал-Халиди – тие сите беа убиени во израелски воздушен напад во неделата.

• „Мислам дека ова е најголемиот број жртви во последните децении, а денешниот протест е протест против убивањето на младите новинари и сниматели на Ал Џезира и начинот на кој Ал Џезира беше цел на Израелците, тоа е без преседан“, рече Мазар Абас, поранешен секретар на Федералниот сојуз на новинари на Пакистан.

Во нападот во недела загинаа вкупно осум лица, вклучувајќи шест новинари и двајца други цивили, според болницата Шифа. Застапниците на печатот го опишаа нападот како дрзок напад врз оние што ја документираат војната.

Израелската војска ја презеде одговорноста за нападот. Ова се случи помалку од една година откако претставници на израелската армија првпат ги обвинија дописникот Анас ал-Шариф и другите новинари на Ал Џезира дека се членови на милитантните групи Хамас и Исламски џихад, обвинување што Ал Џезира и Ал-Шариф претходно го отфрлија како неосновано.