Русија ноќеска изведе масирани напади со ракети и дронови врз Украина, при што беше погоден железнички јазол во близина на Киев, соопшти украинската железничка компанија „Укрзализница“.

„Непријателот продолжува намерно да ја напаѓа железничката инфраструктура. Разурнати се станицата Фастив и возен парк на приградските линии. Нема жртви, но сообраќајот е нарушен“, се наведува во соопштението.

Службата за итни ситуации пријави пожар и разурнувања на железничка станица и депо во регионот на Киев. Оштетувања има и во Черниговска област.

Во последните недели руската армија ги засили нападите врз украинскиот енергетски сектор. Украинското министерство за енергетика соопшти дека ударите ја погодиле енергетската инфраструктура во осум области, поради што има прекини на струја. Екипите работат на итни поправки „каде што безбедносните услови го дозволуваат“.

Во областа Одеса најмалку 9.500 корисници останале без греење, а околу 34.000 без вода.